Dies adest celebris
Настройка шрифта
Dies adest celebris,
Ad lucem de tenebris
Consurge, Polonia,
Pretiosi martyris
Glebam ferens corporis
Laetare, Cracovia,
Stanislai praesulis,
Praeclara miraculis,
Age natalitia.
Ortus de Polonia
Stanislaus studia
Legit puerilia
Studiosa mente,
Tandem Christi vernula
Sublimatus infula
Fit virtutum formula
Domino favente.
Grandescit fitque minimus
Inter majores maximus,
Dignitate sublimior,
Sanctitate praestantior
Praesul Dei Stanislaus.
Corpus domans jejuniis
Frangit panem pauperibus,
Ecclesiae negotiis
Adstat diurnis actibus,
Nocte vacans vigiliis
Instat divinis laudibus.
Imitator redemptoris
Quaerens drachmam decimam,
More boni mercatoris
Margaritam optimam,
Stanislaus, vir amoris,
Corpus poenis dans tortoris
Lucrifacit animam.
O beate Stanislae,
Praesul plebis Cracoviae,
Cujus signa victoriae
Late patent Poloniae,
Nam dono Christi gratiae
Pestes curantur variae;
Tua, martyr egregie,
Festa colentes hodie
Regi commenda gloriae.
Stanislai pro triumpho
Christo demus gloriam,
Qui martyri de tyranno
Contulit victoriam.
Stanislaus, vir beatus,
Legem Dei meditatus,
Boleslao scelerato restitit
Et in via peccatorum non stetit.
Dum profanum Boleslaum
Stanislaus arguit
Et mucrone spiritali feriendum censuit,
Rex impius contra pium cum suis infremuit.
Stanislai Dominus caput exaltavit,
Vocem ejus sanguinis ultor exaudivit,
Peccatorum fremitum et dentes contrivit.
Celebret Polonia
Festiva solemnia,
Veneretur inclita
Passionis merita
Sancti Stanislai,
Quem occidit impia
Dei pro justitia
Manus Boleslai.
Affluens deliciis,
Largus beneficiis,
Belliger in hostibus,
Tyrannus militibus
Hic fuit Boleslaus,
Cujus in temporibus
Plebem Dei legibus
Regebat Stanislaus.
Assumptus ex hominibus
Praesul pollet virtutibus
Sanctus Stanislaus,
Rex pro suis sceleribus
Et insontum cruoribus
Sordet Boleslaus,
Quem pro suis actibus
Castigat crudelibus
Pater Stanislaus.
Sanctum suum Dominus jam mirificavit,
Cujus in certamine mentem dilatavit,
Quia Deo victimam se sacrificavit.
Deus virum sanguinum penitus despexit,
In via justitiae Stanislaum texit,
Dans palmam victoriae justo benedixit.
O Domine, nomen tuum, magnum et mirabile,
Leve jugum passionis facit et amabile,
Pro quo sanctus martyrium pertulit laudabile.
Videns regem depravatum,
Gregem suum depraedatum
Jusque thori profanatum
Spiritali sceleratum
Praesul ferit gladio;
Patricidae mox futuro,
Deum factis negaturo,
Negatur communio.
Ad saeva regis opera
Naturae stupent foedera,
Lactat canem puerpera,
Canis pendens ad ubera
Materna torquet viscera.
Res inaudita saeculis,
Dat lac humanum catulis
Abjecta prole tenera.
Arae Dei dum adstaret
Et divina celebraret
Stanislaus pontifex,
Jugulandum, lacerandum
Boleslaus mittit manus,
Truculentus carnifex;
Ter procedit, ter recedit,
Ter invadit terque cadit
Missus necis artifex.
Confisus in Domino martyr Stanislaus
Hostem vicit moriens vir victoriosus
Et ad montem Domini migrat gloriosus.
Intrat tabernaculum,
Dei habitaculum,
Martyr sine macula,
Per mortis articulum
Carnis sumpsit vinculum,
Victurus in saecula
Quo lux lucet sedula.
Deus, tuo munere justum praevenisti,
Cordis desiderium ejus implevisti,
Cum corona gloriae et vitam tribuisti.
Membra sparsim laniata
Rosae rubent sanguine
Aquilisque deputata
Coelesti munimine
Nocte, die sunt servata
Circumfuso lumine.
Sepulturae commendata,
Sana salva restaurata,
Dei medicamine.
Sanctus iste pro te, Christe,
Rege spreto dato leto
Vir insignis digne signis
Fulget Stanislaus;
Martyr caesus gaudet laetus,
Stat invictus, rex devictus
Gemit Boleslaus.
Pastor cadit in gregis medio,
Sponsus dormit in sponsae gremio
Mater plorans gaudet in filio,
Quia vivit victor sub gladio.
Cleri plebisque concio
In patris natalitio
Jubilet in tripudio
Pro tanto beneficio.
Stanislaus in agmine
Martyrum vernans sanguine
Munit scuto passionis
Castra veri Salomonis,
Coronatus martyrio
Regnat in coeli solio.
De concive, coelum, gaude,
De patrono, terra, plaude,
Stanislaus pari laude
Sanctorum laetatur
Meritis aequatur.
Novis signis Dominus sanctum decoravit,
Dum custodes aquilas sibi deputavit,
Et in nocte corporis partes illustravit.
Ad festa patris incliti populi concurrunt,
Per cujus clara merita mortui resurgunt,
Caeci, claudi, morbidi, aegri sani surgunt
Et ad Christi gloriam laudibus assurgunt.
Veri solis radius, medicus coelestis
Meritorum martyris auctor est et testis,
In splendore corporis castitatem signans,
Quod integrum reddidit, amorem designans.
Martyr Dei Stanislaus,
Gloriosus pontifex,
Quem occidit Boleslaus,
Truculentus carnifex,
Pastor bonus et patronus
Adsit nobis opifex,
Sit virtutum artifex.
Vir inclite Stanislae,
Vita, signis, passione,
Plebem tuam, pastor bone,
Fove benedictione,
Guberna protectione,
Salve sancta intercessione.
Лира, поэтический портал · https://lira-poetry.ru/biblioteka/stihi/vintsentiy-iz-kelchy/dies-adest-celebris/
Есть видео или песня на эти стихи? Добавьте ссылку
Войдите, чтобы добавить ссылку на видео или песню.
- Лайки: 0
- Просмотры: 1
- Комментарии: 0
- 0 Войдите, чтобы добавить в избранное
Комментарии
Комментариев пока нет. Будьте первым.